પ્રકાંડ શાસ્ત્રાભ્યાસ અને તેજસ્વી વકતૃત્વશક્તિ ધરાવતા પૂજ્યશ્રી ક્રમશ: ગણિ-પંન્યાસ પદારૂઢ થયા બાદ વિ.સં. ૨૦૬૧ ના પોષ શુદિ ચૌદશે માત્ર ૩૭ વર્ષની વયે પૂ. ગુરુદેવશ્રીના વરદહસ્તે આચાર્ય પદે અલંકૃત થયા. વિ.સં. ૨૦૪૯ થી આજ પર્યંત અખંડપણે "ગુજરાત સમાચાર" ની ગુરુવાર પૂર્તિમાં "અમૃતની અંજલિ" નામે અત્યંત રસપ્રદ - પ્રેરક કોલમનું આલેખન, ઈ.સ. ૨૦૨૦ સુધીમાં "૯૦" લોકપ્રિય પુસ્તકોનું સર્જન કરીને તેમણે સાહિત્યક્ષેત્રે વિશિષ્ટ કીર્તિમાન સ્થાપ્યો છે. જેમાં તેઓએ આલેખેલ સાતસો પેજ નો "યુગદિવાકર" મહાગ્રંથ તેમજ સાતસો પેજ નો "તમે સૂરજ થઈને ચમક્યા" મહાગ્રંથ શિરમોર છે. ૧૮ શિષ્યો-પ્રશિષ્યો ધરાવતા પૂજ્યશ્રીએ સૂરિમન્ત્રની પાંચ પીઠિકાઓ તપ-જપ સહિત આરાધવા ઉપરાંત વિ.સં. ૨૦૭૦ માં વર્ષીતપ સાધના કરી છે. આજીવન અંતેવાસી રહીને ગુરુદેવની સર્વ શાસનપ્રભાવનાઓમાં પ્રાણરૂપ બની રહેલ પૂજ્યશ્રીના વરદ હસ્તે પ્રતિષ્ઠાઓ - ઉપધાનતપ - પદયાત્રા સંઘો - નવાણું આદિ શાસનપ્રભાવનાઓની અવિરત પરંપરા સર્જાઈ રહી છે, તો યુગદિવાકર ગુરુદેવશ્રી તેમજ દર્ભાવતીતીર્થોદ્ધારક ગુરુદેવશ્રી ની પુણ્યસ્મૃતિમાં તેઓશ્રીની પ્રેરણા - માર્ગદર્શનથી નેશનલ હાઈવે નં. ૮ પર મુંબઈથી નિકટ "શ્રી ધર્મધામ નાગેશ્વર પાર્શ્વનાથ તીર્થ" તથા "શ્રી ધર્મસૂર્યોદયધામ જીરાવલા પાર્શ્વનાથ તીર્થ" રૂપે બે ભવ્ય તીર્થોનું નિર્માણ થયું છે. ઉપરાંત તેઓશ્રીની પ્રેરણાથી પૂ. ગુરુદેવ આ.ભ. શ્રી સૂર્યોદયસુરીશ્વરજી મ.સા. ના (ઈ.સ. ૨૦૨૦ સુધીમાં) ૩૧ ગુરૂમંદિરો ની પ્રતિષ્ઠા થઇ છે અને હજુ પાંચ ગુરુમંદિરો ની સંભાવના છે, જે તેમના પર વરસતી અનરાધાર ગુરુકૃપાનું પ્રતીક છે. ગુરુભક્તિ - ગુરુકૃપાના પરમનિધાન સિદ્ધહસ્તસર્જક પૂજ્યશ્રીને વિનમ્ર વંદન...